近排寫太多政治，吊頸都要抖下氣(呢句嘢其實想點？)，趁拜登份武肺調查報告未出，講返啲輕鬆嘢：七仙羽。
聽咗七仙羽個名好耐，第一次睇佢係响《Error自肥企画》，當時仲以為佢大陸落嚟。後來check下佢背景，先知道佢咁有趣：大馬華人，响台灣同新加坡長大，大學主修新聞，碩士主修商業管理，曾居於克羅地亞、德國、印度，又响台灣做過記者，到港後投身風水師行業。
今日我睇咗第一集《七救星》，覺得佢好有喜感，係令人噴飯嗰隻。BTW，《七救星》呢個名，即時令我諗起TVB响90年代嘅經典節目《笑聲救地球》。
七仙羽真係好有南洋人嗰種膠味，唔係香港人扮出嚟嗰種「硬膠」。以專家/師傅口吻玩膠，早年有羅家英，近年有專家Dickson，佢地都好好笑，但就唔及七仙羽嗰隻認真地派膠，膠到若無其事。
唔少網民鬧七仙羽係騎呢神棍，她則一副「別人笑我太瘋癲，我笑他人看不穿」模樣，典型九型人格7號仔style。同一般風水師唔同，七仙羽真係笑罵由人，敢作敢為，夠癲夠放。只要你唔當佢係事必要道貌岸然嘅風水師，而當佢係Error嗰隻搞笑藝人，佢根本就好稱職！
相比之下，麥玲玲就兩頭唔到岸，做風水師畀人話唔夠專業(睇錯羅庚事件大家仲好記得)，做藝人又嫌唔夠funny。玄學界你想要青春玉女，睇唐碧霞啦；要冷面笑匠，睇羽膠七啦。
第一集《七救星》嘅嘉賓係林作+佢老母+裕美。我本身好很憎林作一家三口，係睇都唔想睇嗰隻。但因為有七師傅主持，成件事就唔同晒，原來佢係發揮到「以膠制膠」嘅化學作用，令觀眾睇到班煩膠嘅可觀性。
生活响香港呢個每日充斥荒謬嘅社會，對住班癲倒黑白是非嘅人渣，玩膠可能係最好嘅心理治療，所以我地需要Serrini，需要Error，需要七仙羽。
